“ ‘NA PICOLA FAVOLA”

Xè el tempo de Nadale e me nona, poareta, la me disea sempre: “lè el pì bel periodo par contar qualche bela storiella così quando che sarè grandi, se no le gavè desmentegà, conteghele ai vostri toseti e vedarè che i sarà contenti parchè questa che te conto la xè ancora una che me ga contà la me mama e te vedarè che come ogni favola, la termina ben…

            Amir el gera tanto, tanto poareto. De giorno el strolicava, de note nol dormiva sempre pien de pensieri, de come far a darghe da magnar a la so cara sposeta Mehisà e al so manipolo de oto fioi.

Alora zo in tei paeseti brusai dal sole che gnanca i sassi i nasse, podè imaginar el strolicar d’un popà e ‘na mama quando i sente, diese, vinti volte al giorno: “Mama, poà, go fame”. Da far venere el pel de galina.

Ma noialtri saremo che gavemo un solo pupà, una sola mama – la diceva la nona – e lori no i desmentega mai i loro toseti, parchè i ultimi su sta tera, i sarà i primi quando i rivarà in paradiso. E me nona continuava…

Eco che ‘n vecioto, un giorno, ghe dise: “Seto Amir, ti te si ancor zovane e a un’or de caminar da chi, te trove ‘n pozo co l’acuqa. Ciapa ‘n secio, do volte la matina, e do al dopo mesojorni, porta qua l’acqua e un bussolotto a uno, un bussolotta a l’altro te la vendi e pol guadagnarte on scheo e varda, par iutarte a mi te me ne vendi tre”.

Così Amir, con un vecio secio, ‘n regalo de so compare, e anca un poco ruzene, se ga meso in strada e par giorni, mesi, col sole che scioccava, coi oci pieni de vento e sabia, pensando ai so toseti, quattro volte al giorno el servia tuto el paesetto.

Ogni viaio ch’el fava Amir se acorseva che acqua ghe n’era sempre manco in tel secio. Poro diavolo, in più dei piè sgonfi a forsa de caminar, straco-finio, anca el secio gerà drio a render l’anima. Infatti el cominsiava ad aver qualche busto. E così a sera i schei diminuiva anca lori.

Ma gera scrito da qualche parte che tanta fame, miseria, scalogna, le fusse un giorno premià. Tanto andar che vegner el caminava dalla stessa parte, el secio perdea le so gosse de acqua e toh che qualche mese dopo Amir se ga acorto che spuntava qua e là qualche ciufeto de erba e qualche bel fioreto de tanti bei color.

Alora sto Amir, fuselo nato anca in te na tera poareta nol gera proprio insulso, el gavea capio l’antifona, par miracolo el ga trovà ‘nantro secio, sbusà un poco anca quelo, el ga scomisià i giorni de siè viai.

Eh sì! Acqua, quel che restava a la zente, l’altra persa, adesso un po’ apposta, fato sta che più o meno dopo siè mesi el gà fato la prima racolta dei so bei fioreti…

I ani sono passai in fretta, dandoghe da maganr a tuta la so fameja, ga pagà le scole; el primo dei so fioi col secio sbusà ga inventà el sguassaorto, el secondo xè diventa agronomo e offerto al so popà e mama, coi altri fra dei e sorelle, un bel negosieto dei fiori, erbe, piantine in te na bel aictadina a qualche oreta a piè de là…

            Cari i me toseti in te la vita non bisogna mai disperar, da qualche parte gavemo na stela che protegge e un amico che nol se desmentega ma de le nostre tribolasion e se ogni tanto el premio i lo dà su la tera, come Amir, che dopo tuto ghe ne visto de cote e de crue, ai altri ghe lo dà quando partiremo da sta tera par ‘ndar lassù in Paradiso, se gavemo i meriti.